ખેડૂત આંદોલનને લઈને ફરી એકવાર ખેડૂતો દિલ્હીને ઘેરવાની તૈયારી માં...

ખેડૂત આંદોલનને લઈને ફરી એકવાર દિલ્હીને ઘેરવાની ખેડૂતોએ તૈયારી કરી લીધી છે. પંજાબ-હરિયાણાની સાથે અન્ય ઘણા રાજ્યોના ખેડૂતો દિલ્હી કૂચ કરવાની તૈયારી કરી રહ્યા છે. જો કે, ખેડૂતોએ તેનું નામ ‘ચલો દિલ્હી માર્ચ’ રાખ્યું છે, પરંતુ તેને કિસાન આંદોલન 2.0 પણ કહેવામાં આવી રહ્યું છે. વાસ્તવમાં આ ખેડૂતોના આંદોલનની પેટર્ન 2020-2021ના ખેડૂતોના આંદોલન જેવી જ છે. ગત વખતની જેમ આ આંદોલનમાં પણ વિવિધ રાજ્યોના ખેડૂતો જોડાઈ રહ્યા છે.ખેડૂત આંદોલનને ધ્યાનમાં રાખીને દિલ્હી અને હરિયાણામાં કલમ 144 લાગુ કરવામાં આવી છે. દિલ્હીની ત્રણ મુખ્ય સરહદો સિંઘુ, ટિકરી અને ગાઝીપુર પર લોખંડ અને કોંક્રીટના બેરિકેડ લગાવવામાં આવ્યા છે. કાંટાળા તાર, કન્ટેનર અને ડમ્પરો લગાવીને રસ્તાઓ પણ બંધ કરી દેવામાં આવ્યા છે. એટલું જ નહીં સુરક્ષાના કારણોસર દિલ્હીના બે મેટ્રો સ્ટેશનના દરવાજા પણ બંધ કરી દેવામાં આવ્યા છે. તેમજ દિલ્હી-નોઈડાના સરહદી વિસ્તારોની શાળાઓમાં રજા જાહેર કરવામાં આવી છે.