દેવેન્દ્ર ફડણવીસ મહારાષ્ટ્રના નવા સીએમ....

કેન્દ્રિય ગૃહ મંત્રી અમિત શાહ સાથેની બેઠક બાદ મહારાષ્ટ્રના નવા મુખ્યમંત્રી ના નામને મંજૂરી મળી ગઈ છે. સૂત્રોના જણાવ્યા અનુસાર આ માહિતી સામે આવી છે. સૂત્રોના જણાવ્યા અનુસાર દેવેન્દ્ર ફડણવીસ મહારાષ્ટ્રના નવા સીએમ તરીકે પસંદગી પામ્યા છે. જ્યારે એકનાથ શિંદે અને અજિત પવારને નાયબ મુખ્યમંત્રી બનાવવામાં આવી શકે છે. ગુરુવારે રાત્રે મહાયુતિના નેતા દેવેન્દ્ર ફડણવીસ, એકનાથ શિંદે અને અજિત પવાર ગૃહમંત્રી અમિત શાહને મળવા દિલ્હી પહોંચ્યા હતા. આ બેઠકમાં જ આ સમીકરણ પર મહોર મારી દેવામાં આવી છે. બેઠકમાં બંને સાથી પક્ષો એ વાત પર સહમત થયા હતા કે જો ભાજપનો મુખ્યમંત્રી બનશે તો બંને પક્ષોને તેના પર કોઈ વાંધો નહીં હોય. મંત્રી અમિત શાહની અધ્યક્ષતામાં તેમના દિલ્હી નિવાસસ્થાને 2 કલાક લાંબી બેઠક મધ્યરાત્રિએ સમાપ્ત થઈ.બેઠકમાં એ વાત પર સહમતિ થઈ હતી કે મુખ્યમંત્રી પદ બીજેપી પાસે રહેશે અને ગૃહમંત્રી અમિત શાહે પણ 2 નાયબ મુખ્યમંત્રીઓના નામ પર સહમતિ દર્શાવી છે, જેમાંથી એક શિવસેના શિંદે જૂથનો છે અને બીજો નાયબ મુખ્યમંત્રી અજિત પવાર એનસીપીના હશે. જો દેવેન્દ્ર ફડણવીસને મુખ્યમંત્રી બનાવવામાં આવે તો તેઓ ગૃહ ખાતું રાખે તેવી શક્યતા છે. નાણા વિભાગ NCP પાસે જવાની ધારણા છે. શિંદેની આગેવાની હેઠળની શિવસેનાને UDD અને PWD મળવાની અપેક્ષા છે. આ બેઠકમાં કેબિનેટમાં પદોની વહેંચણી, વિભાગો, વૈધાનિક બોર્ડ અને નિગમોની વહેંચણી અને કેન્દ્ર સરકારમાં શિવસેના અને એનસીપીને વધારાના પ્રતિનિધિત્વ અંગે પણ ચર્ચા કરવામાં આવી હતી.