હમાસે ઈઝરાયેલ પર 2000થી વધુ રોકેટ છોડ્યા, વડાપ્રધાન નેતન્યાહુએ 'યુદ્ધ' જાહેર કર્યું

ગાઝાએ ઈઝરાયેલ પર અત્યાર સુધીનો સૌથી મોટો હુમલો કર્યો છે. મીડિયા અહેવાલ પ્રમાણે હમાસે ઈઝરાયેલ પર 2000થી વધુ રોકેટ છોડ્યા છે. હમાસે પોતાના હુમલામાં ઈઝરાયેલના ઘણા રહેણાંક વિસ્તારોને પણ નિશાન બનાવ્યા છે. સૂત્રો પાસેથી મળેલી માહિતી મુજબ હમાસના ઘણા આતંકવાદીઓ ઈઝરાયેલમાં ઘૂસ્યા હોવાના સમાચાર પણ સામે આવ્યા છે. જોકે, હમાસના ઉગ્રવાદીઓના ઈઝરાયેલમાં પ્રવેશની સત્તાવાર પુષ્ટિ હજુ સુધી કોઇએ કરી નથી. ગાઝાથી રોકેટ હુમલા બાદ ઈઝરાયેલે પણ નિવેદન જાહેર કર્યું છે. ઈઝરાયેલે પણ યુદ્ધ જાહેર કરી દીધું છે. ઈઝરાયેલના વડાપ્રધાન બેન્જામિન નેતન્યાહુએ કહ્યું કે તેમનો દેશ યુદ્ધમાં છે અને હમાસને તેની અભૂતપૂર્વ કિંમત ચૂકવવી પડશે. તેમણે વીડિયો સંદેશમાં કહ્યું કે ઈઝરાયેલના નાગરિકો, અમે યુદ્ધમાં છીએ. આ કોઈ ઓપરેશન નથી, કોઈ તણાવ નથી – આ યુદ્ધ છે અને અમે જીતીશું. હમાસને ભારે કિંમત ચૂકવવી પડશે.

ગાઝાથી ઈઝરાયેલ પર 2 હજારથી વધુ રોકેટ છોડવામાં આવ્યા છે. નોંધનીય છે કે શનિવારે ઈઝરાયેલમાં તહેવારની રજા છે. આવી સ્થિતિમાં આ પવિત્ર દિવસની સવારથી લોકો ઈઝરાયેલ ડિફેન્સ તરફથી રોકેટ પડવાના અને સાયરનનો અવાજ સાંભળી રહ્યા છે. આ હુમલો સવારે સાડા છ વાગ્યાની આસપાસ થયો હતો. લગભગ 40 મિનિટ સુધી સાયરનનો અવાજ સંભળાયો હતો. ઈઝરાયેલે આ હુમલા પર પ્રતિક્રિયા આપતા કહ્યું છે કે ગાઝાએ આ હુમલાની ભારે કિંમત ચૂકવવી પડશે. અત્યાર સુધી પ્રાપ્ત માહિતી અનુસાર આ હુમલામાં એક મહિલાના મોતના સમાચાર છે.